遲來的南油第一水大激戰

TC.. · 發表於 2/6/2010 21:49:36

本帖最後由 TC.. 於 2010-6-3 00:30 編輯

遲來的南油第一水大激戰

好耐都無見，因為無乜新紀錄，所以無post，
今年南油船好難卜，4月中打比船家，
諗住卜2010年5月中出今年第一水，點之......
船家話full 哂，最快都要5月30號，
船家仲話今年好鬼full，最好卜哂全年。

依幾日天氣好唔穩定，東風又時大時細，
好似星期五果水又取消，我地星期日都係5、5波，
我連架生都唔敢整理，到左星期六先敢去準備，
因為如果整好哂先話出唔到，就會down到死！

星期日睇哂天氣圖、海浪圖，吹西南3,4，正到爆！出發 LU！
今次上到船，見到好多高手師兄，有手繩、有jigging，
今次應該好好玩，又學到野！

31號清晨埋到井，但係無咩攪，淨係幾條班仔，
跟住轉左幾個井，都係魚仔食餌，
大家只好開飯休息下，

中午後，釣下蕃薯，用D冷飯打下誘餌，引下D池仔升水，
釣到池仔，唔駛講，更係第一時間做大餌釣底物，
不得了，池仔到底唔夠30秒，睇竿頭已經知道條池仔震過貓王，
跟住已經知道條章雄開緊餐，跟住鬆少少比佢食深D，
WOW，竿頭即刻飲水，我再揚竿，磪保打入魚咀，
電掣一按，70m..56m....20m.........撈箕，
嘩！十幾廿斤章雄已經到水面，但係一見光再爆，
....................20號YGK碳腳即斷，慘！
跟住用100lb碳，半水再斷兩口，慘！慘！
今年D章雄好惡，同船好多師兄都斷到喊，

最後，無奈只好轉130lb VARIVAS shock leader，
但係因為leader唔直，有D電話線，但係無其他選擇！
再落大池，依......無反應，唔通唔食電話線.........
足足等左5分鐘，諗住行去隔離師兄道八卦下....
點知，我支竹都未試過咁彎，不得了，大章雄食餌！
90m.......76m停左，出了10m再行........62m..50m再停，
我心諗唔好斷，唔好斷.....上到10m流船底，好鬼驚，唔好斷！
直至見到快扣都諗住係大章雄，點知我同魚童都估錯，
原來係25斤大黃勒班，果撈箕都係剛剛夠撈。
影完相再落大池，又中......今次應該係大章雄，段段都有力，
上左10m，隔離師兄又中，一齊上，上到一半唔多對路，
我見到我地兩支竿條布線開始走V型，上多60m，一齊彈竿，
WOW，斷哂，大家條腳線都係斷中間，我條130lb，佢條200lb，
好無奈.......跟住就靜哂！

食完晚飯，轉井沖下涼，準備夜晚大戰黃旗，
未到8點，黃旗已經開口，我地轉用手繩，
先用40lb試下D魚大細，諗住夠用，
點知一到泳層，搶手袋事件又出現，
今年好鬼狼，我地副40lb制佢唔住，拍！齊齊斷！
拿拿聲轉副80lb，先上番幾條，
跟住其他師兄都不斷釣上雞魚、紅鮪、海鯉、籃牛廣、紅瓜子等等

0430咩魚都齊齊收口，我地都筋皮力盡，風又開始起，走人！
訓左一陣，風漸漸大，碌左碌右，碌醒左，但係因為真係好累，
唔理喇，碌碌下又訓返，ha，2010第一水就係咁完結！

PS**請問各位師兄有乜好既碳腳介紹下！唔該哂！

**後加補充：今次出油井新體驗，我地晚上埋井過夜，
有油井工人用手咪同我地講要魚加送，船家就好識做比左幾條好魚佢地，
後尾仲比返箱飲品我地，仲用咪講"(國語)老闆，祝你們釣多點，謝謝你們的魚"
船家話，如果油井工人要救唔係大過份都會比，
佢話拖boot有時埋井吊櫃做工程，就一定要走，如果唔合作，
就會玩寸哂，你再駛埋少少都趕硬，成晚唔駛釣！

我坐依個船家，印象中，真係未趕過，除非你埋果面要吊櫃！