5‧21之雅比處航南油

雅比 · 發表於 24/5/2010 14:44:51

本帖最後由雅比於 2010-5-24 14:52 編輯

日期：2010年5月21-23日
地點：南油
魚穫：吞拿、煙仔、紅鮪、斑斑、章紅-------->全部都無我份 =.="

恨左成年既南油之旅終於鐵定5月21號出發，無奈南油天氣唔多穩定，未到出發果刻，都唔知可唔可以成行，但話雖如此，準備依然係要做足啦。

由於今次係雅比處航之旅，除了一顆熱熾既心之外，就乜架生都無，幸好承蒙兩位版大答應借出名貴架生比乜鬼都識既我試玩，否則就只可以晚晚發夢出南油而已。所以在此真係要感激Joe大人同James大人，兩位真係教識左我好多野，令我眼界大開！

行程：
5月21日，1900準時開船，開船果一刻真係好鬼興奮，因為真正感覺自己去緊南油，傻傻的望住個海已經足已令人由心笑出來，呵呵！！

安置好架生後，入船倉睇下個睡房，嘩！有窗架，sea view room，哈哈哈！一房三床位，一上格床位，兩下格床位，唔洗諗啦，今次一於採用女上男下攻略，我訓樓上﹝sea view﹞，兩位版大就孖舖訓樓下。

2000拎完生餌後，開餐食野，是晚有燒味，食完由於時間尚早，所以就跟兩位大人學set架生，邊學邊消化邊落手綁，總算學識少少啦，為左養足精神釣魚，所以set完野後就去覺覺豬了。

5月22日，0400溫馨叫床後，馬上彈起身出去望下咁大個女第一次見的油井，嘩嘩嘩！真係有油井架，開心死雅比！！既然目的地已到，馬上作釣啦。第一次用南油架生，好陌生，又有D驚，因為怕自己唔識用，有咩事的話，我真係對唔住Joe大人了.....

時間慢慢過，終於0500竿頭有反應，呵呵，我的南油第一震........收收收.....收收收....收收收......果然係一條魚.....無錯！真係一條魚......睇真D.....OH MY GOD.....係一條.....小小的牙帶魚......=.=" 這便是我的處航魚....感謝主！！起碼破左處先！

既然開左齋，當然好開心啦，無奈七點左右開始有船來趕，無計！迫住要轉井....

轉井時間要差不多兩小時，呢個時間最好就係為自己叉下電。約0930到了目的地，呵呵，轉左井果然唔同d既Joe大人好快就中左條靚靚既斑斑，雖然我仲未有第二條魚，但我見到都已經好開心了！無幾耐，James大人突然按動電絞，咦？！有料到！我睇得好緊張之時，James卻輕輕鬆鬆，出慣大場面果然唔同D。終於見到魚影了，嘩！唔講得少.......上水了，嘩！真係唔講得少.....十二斤斑斑，勁！此時，James臉上的笑容，就好似初戀一樣咁甜呀！﹝我都好想有初戀既感覺......幾時先到我？！﹞無幾耐，呵呵，我有魚中，好野！但....點解無力？？成日見人地係南油上魚要九牛二虎之力，但點解我中既魚咩力都無架？正當一頭霧水之時，魚已上水了，又一次oh my god....泥婆一條....又要感謝主！賜我一條魚.............

中午時間又到了，此時，見到船長好輕鬆咁收緊佢自己的手絲，輕鬆成咁，應該唔會係咩大野啦﹝我心諗﹞，但.......當魚童撈上來時，我以為自己眼花......邊得來咁大條斑架......49斤......無錯，係49斤斑斑.....勁！！

而直至2000前，全船都只係得零碎既魚訊，而且玩沉底既可以講係無反應添，真陰公！！2000後，浪湧開始大，中層亦有反應，其他釣友開始釣到煙仔同吞拿﹝放流及jig﹞，既然係咁，我都要jig下先，唉！講就容易，jig半粒鐘，隻手已經累了，原來真係體力唔夠，無哂計，唯有繼續用電絞仔啦，由底開始慢慢試上來，試到2300都係無反應，其間有一口，可惜最後都甩，仲要炒左James粉，要解都有排，唯有入倉休息下啦，反正浪湧已經愈來愈大，D浪一上一落時，可以見唔到對面隻船....較好鬧鐘小休一小時，一小時後聽唔到出面有反應，唔通好靜口？既然係咁，繼續訓啦，兩點先再起身作戰.....

5月23日，0200正想起身出去釣，卻見兩位大人步入房，原來....我小休期間煙仔吞拿大咬，但要玩放流，不過版大都有得中，正當與條魚力併期間，炒了6副PE，大煲！條魚仲要直指船底，大煲！結果......魚被版大收服了，代價係......炸竿！我聽到都心痛死了......唔怪得兩位版大兩點就返房訓啦，原來無心機 + 浪湧太大....

0800，訓醒想出去行個圈，沖個涼，點知兩版大連涼都唔比人沖，話船太搖，怕危險，連我去廁所都要陪...望一望窗外，嘩！真係好大浪湧，唔講得笑喎！唉！無咩好做，唯有再訓到十二點，入到港內總算平靜D了，可以行來行去，食埋lunch，睇埋人地分魚，咁就行程完結了...幾咁快的三日兩夜....

總結：

全船共有近4擔的魚，大部份係放流中。而我，有了第一次的經驗，對南油的釣行了解多了，明白體力是十分重要，所以，輕火應該是我下次的目標玩法。

我更要多謝兩版大對我的照顧及教導，或者今次我令兩位失望，但相信下次我一定能做得更好！

未出發，先興奮