手竿釣魚046---好姐試竿

5月23日（星期五）係又行雷又落雨嘅最後一日，
因為跟著嘅星期六，日，都幾好天。
但係一早就請左假，冇辦法。
照計劃，一早又走左去好姐到玩下，順便試下買落同整好嘅新竿。
是日架生：21尺手竿，北極熊。（新買，上過紅鮋仔一條）
          12尺並繼手竿，仙竹改前打。（二手買番黎改左，上過斤頭百花鱸）
          8尺槍柄路亞竿。獵。（新買，上過斤半百花同半斤馬友）
          18尺手竿。幻匠（本人至愛，上魚無數，今日先知原來最強嘅）。

9點幾去到就開始落雨，直到下午2點幾。好彩只係細雨，間唔中有小小大同行雷。
立即開支21手竿玩下，15，5尺到6號尼龍6號單勾直出，勾舊死魚落去等。
揸左支竿9個字到，先有魚埋黎食餌，真係手都軟呀！
見條絲係水面好快就比被拉直，緊係星鱸，唔理一抽，中！
可能係條絲太短，支竿比條魚拉到起晒弓，條腰真係冇乜力。
心諗如果條絲有18尺，最多去到半弓，仲有位走棧。
玩左一陣，又驚行雷，就叫朋友幫手撈魚算啦！
如果唔係仲可以玩到條魚謝晒，先用手拉佢上水都得。
上水後用新買嘅魚尺量一量，有57cm都算係咁啦！
下次好天，先再試真d。一於轉玩12前打。

又係極速開竿，係落緊雨嘅時候開竿真係幾辛苦。
都好最後攪掂，2號尼龍直出指甲大嘅單勾加一粒3b夾鉛，勾半截死蝦試下。
半粒鍾後又中一條29cm嘅紅鮋仔，用呢支竿同佢玩，夠用有凸。
跟著，又係死蝦。今次又係星鱸，因為條魚好大力又穩定嘅四圍冲。
支竿已經彎晒，由於係測試啫！唔駛咁駁，全程保持住90度彎就夠。
條魚向左走我就跟住向左走，佢向右就跟住向右走，玩多幾轉都得。
點知一向外冲，就比佢拉直支竿，跟住斷埋。
我諗：死蠢！都唔放下絲，一手都唔放，緊斷啦！
之後再黎過，又係中星鱸，
今次有經驗，識得放下絲玩得耐左好多，又走來走去，過足有手癮。
後尾隔離塘有兩位師兄都問我係到攪乜鬼。
可惜2號尼龍都係敵唔過星星潛水艇，佢一向外直冲就玩完。
唯有下次換過4號尼龍再同佢地玩過。

玩完前打都係正經d，玩番支18尺手竿算。
16尺4號尼龍單勾直出，死蝦似乎係最得食。
過左差唔多一粒鍾，手竿中左一條50cm嘅星鱸。
同支21尺比，呢支18尺感覺上好腰力好多，控魚比較容易。
事後想可能同主絲長度有關，唯有寄望下次要試真d。
因為支手竿玩直感定浮漂都搵唔到魚，唯有又攪其他啦！

今次玩下支假餌竿，開頭都拖左十零次米諾，完全冇反應。
心諗假餌唔食咪玩真餌囉！一於假餌竿當投竿用。
將子絲嘅快拆前左佢，加粒中通鉛加隻單勾，攪掂。
又係死蝦。一拋……估唔到原來好好拋嘅，仲遠過用支15尺磯竿添！
等左一陣，有星鱸大力拉竿出絲，一抽，中。
由於支假餌竿係平野黎，比條75cm嘅星星拖著又係彎晒，有時仲會出絲減下壓添！
玩左一陣先上到水。度完條魚之後，證明支竿抵玩，唔錯！
既然投竿有機就繼續玩過，不過之後食餌嘅方式唔同之前。
只係拉一拉，唔多出絲就停左。唯有收緊虛絲，睇下係咪仲食緊，又冇喎！
過左一陣又拉，同之前一樣。睇黎係細魚攪鬼。收番冇左口餌啦！
再黎過，今次唔係啦，一食即抽，又中。
收呀，收呀！條魚冇力嘅！收到十零尺到條魚反身，一閃。斷左！
斷之前見到好似黃立倉咁，但係紅色肚嘅。心諗食人倉！？
唔埋又黎過，今次同之前一樣食法，又日戈中即抽，又中！
攪呀，攪。好快就攪左上水，真係食人倉黎！
睇見d牙都驚，正所謂“驚佢有牙丫嗎”！
都有30cm到咁大條，結果又上多兩條就夠鍾收工走人。臨走前有人黎收雨傘, 就問佢: 果d係咪食人倉? 佢話唔係, 係紅肚倉先真!!

總結，今次釣行覺得，d魚好似大力左。不過唔多肯開口食餌。
魚場d魚真係越來越難釣。

多謝分享

多謝分享

mckw2004 發表於 28/5/2014 08:04
多謝分享

多謝!

aaronfung 發表於 28/5/2014 08:45
多謝分享

多謝!!

紅肚倉,非食人倉 不過,真係好好魚!!!!!

過足引...

12345 發表於 28/5/2014 21:34
紅肚倉,非食人倉 不過,真係好好魚!!!!!

多謝提醒!!

咁都叫多魚?
十條都冇呀!!

最強幻象 發表於 28/5/2014 22:01
過足引...

多謝!!

再多幾條就好啦!!

FELIX009 發表於 2/6/2014 23:11
多謝!!

再多幾條就好啦!!

好懷念以前既上白泥魚場...一日五六十口魚訊真係悟知試幾多次...仲要大大條盲鰽...