尊重

剛剛睇了一塲電影，感受好深。唔係講套電影得唔得，拍得再好嘅電影，都需要有好嘅觀眾去用心欣賞、將看電影當作一件什麼回事。買票時明明係好滿座，為何只有我倆口子？！預告播放完才開始有點觀眾入塲，
00:01 荷里活鉅作開始了
00:17 唔該借借，唔該。
00:20 邊度呀？邊行呀？
00:32 bb, come over here.....
00:45 whaoo... We are really late... Sorry sorry
00:51 行去邊呀，呢度呀！
........00:52....全院滿座了......

究竟而家觀眾看電影係咩一回事，用咩心情和態度去進行呢件事？！

曾幾何時我會預約朋友，同學去看電影，去買預訂戲票。有時早一星期也買不了票。放影當日會預早到戲院門前等待、個個觀眾一樣、把門口大堂塞得滿滿、還記得我們會怎樣打發時間呢？去看看門口高高掛的海報油畫、不日放映的劇照、早場咸戲嘅時間表、入五毫子磅體重（彩輪一轉、便跌下硬紙牌）、吃走鬼檔炸大腸魚蛋牛雜蒸花生鵪鶉蛋咬甘庶酸薑話梅蕎頭皮蛋冰菠蘿冰蘿蔔烤魷魚、再吃小食店爆谷雞翼華園齋鵝粒魚皮花生滷鴨腎甘大滋橡皮糖美味米魷魚絲仲有賣飛佛醒目牌曲曲薯片和時興隆一包三條嘅咖喱卷。
進塲前一刻你推我擁，唔知以為係不設劃位。不日放映嘅預告片非常精彩、見到成龍飛天下海、又見到林正英急急如律令、突然全塲肅然起敬、因為"櫈鄧燈登＂嘉禾四金磚商標一出、代表好戲連塲、當時大家好開懷睇電影、會笑會叫會哭會妖~氣氛一流、睇鬼片好多時會比其他觀眾嚇親。散塲時個個開始議論紛紛、前面話好勁、後面果個話好正、講唔夠打冷宵夜糖水再講過。

資訊發達了，安座家中就可買票、
所以就少了一分尊重呢個和電影嘅約會、呢份尊重係要你辛苦約人再辛苦排隊先會有、準時更加唔使講、睇戲已經淪為可有可無的拍拖節目、因為開放的妳已經唔使入戲院才可以拖下手仔、摸下脾仔、揸下波仔、和錫下咀仔。以前約女仔睇戲係一個關口、亦係佢地嘅缺口。

點都好啦、一起向它們敬禮！
總統戲院永遠懷念。
京都國泰難以忘記。
西環福星咸片最強。

睇你寫段嘢。。係一個老戲迷。80-90年代初係香港電影最風光及賺錢嘅時候!果陣時睇午夜場。。。你買張飛都難!早期嘅成龍,周潤發,後期d嘅周星星,劉德華,梁朝偉,套套戲都賣到滿堂紅,仲有間中d2線姐仔出嚟拍三級片。。都好好收!以前D戲院幾咁大間。。而家有D蚊形影院。。睇戲都無晒以前嘅感覺!而家D港產片。真係唔識講。。只係間中。。。不過都要很久先有d好戲!仲有就係而家如果個套好收嘅話。。。就死喇。。。就好似無間道咁。。嗰段時間嘅戲。。全無間。。。間到你死為止!好多戲拍到爛晒。。。最嚴重嘅就係當年嘅賭片。。。。。真係套套賭到你暈。。賭乜賭物。。你諗到都有!以前新年差唔多8成都係笑片。。就算唔係笑片都唔會係三級片或死人戲啦!大佬呀新年係一家大細合家歡睇戲時段。。你整埋D三級片呀死人片做咩呀!當年果套東成西就真係笑爆咀。。大家可以去睇番。。勁攪笑!香港人而家都好慘。。。唔該新年時拍多D笑片及適合一家大細嘅電影啦!不過始終時代進步咗。。。睇戲好多人都係屋企睇,氣氛完全已經感覺唔到!就如數碼相機。。以前係買菲林影,影完後你會去充曬,心情極度期待,究竟先頭影得好唔好呢?晒完出嚟一定有好有唔好,但係等待果種心情而家嘅數碼相機就唔會有喇!影得唔好咩刪除再嚟過!不過我哋都係接受現實啦!變幻才是永恆!!

多謝分享!
師兄, 講得好傳神呀!

唉，其實我地果代唔會失約，遲到已經好衰，無故失約會絕交㗎。因為我地無手機，無call機、早一晚約好幾點邊度，就係果度等，好少失約。唯一有事就搵電話留口訊比自己屋企人或朋友屋企人。
現今手機發達，遲到，失約，一大堆理由。完全唔駛負責任，因為已經通知咗你。

要記得向魚樂網致敬...
可能...

don媽...咁咪証明你同我都老囉...
點都好，睇完你呢編o野..感受好深!!

比我copy來分享下..可以嗎?

當然啦！老友

naobao 發表於 2012-7-14 23:51
要記得向魚樂網致敬...
可能...

爆叔、平常心。我見親你都欽敬欽敬架啦

松田先生 發表於 2012-7-14 23:57
don媽...咁咪証明你同我都老囉...
點都好，睇完你呢編o野..感受好深!!

我好想有番果種氣氛、屬於我哋果種享受。
真係要好好生活、享受呢一刻、珍惜你擁有嘅人事物、因為時間會奪走一切。