人生第一鯉+魚樂尺開光

話說上回講到
口賤之人終於得到大物斷絲既報應
今日趁番完夜又風和日麗
收拾行裝開左同一份餌
打算去番同一個地點尋找大物報斷線之仇

估唔到本應是非仔集會既地點
今日連非甩雞毛都唔多條



而平時上得唔多既藍刀就不斷上門
唉唔係話見到你地唔開心
不過你地上親水都咁high發到我周圍都係潺
又要發到爆晒嘴爆晒血
咁我好難同你地父母交待架嘛









講番正題
話說上次同一份餌同一個位
吸引左多次大物斷我米路
抱住些少期待既心態之下
大物終於來訪

（無相兼粗口消音處理完畢）

到底一個人要有幾手短先可以連續響上撈箕個陣斷三條鯉魚啊啊啊


總之事情就係
今次三條條條都粗過長過我腳瓜既靚仔鯉魚
全部都成功打八字之後上晒水面抖大氣拖到埋岸
響天橋上對岸上各位街坊釣友既熱烈打氣之下
本來都理應係網中之魚


結果全部都因為本人手短唔夠撈箕長之下
fing一下頭就甩鈎斷絲滋滋油油咁落番晒水
鯉魚真係好溫柔冇咩大動作但就好有力
同d動不動發黎發去既非仔真係唔同級數
不過又係兩種唔同既好玩法


過左兩轉鯉魚開飯時間之後開始靜
連藍刀都收緊口
正當我打定輸數諗住唔通d鯉魚真係咁唔鐘意我
將個兜入面尾二個口餌包上鈎扔落水——


慢慢吞下吞下咁食左兩格標仲食緊
——呢種滋滋油油既食餌動作今日都睇過幾次
響咁多次教訓之下話比我知依條真係鯉魚
依條（應該）係我今日最後一次機會呀

無論如何一定要上左佢如果唔係冇顏面見鄉親父老呀


又響多次教訓之後終於記得
人手短就要唔好懶
於是帶左佢行街街
行到支撈箕終於掂到水既位置


響呢度我要多謝我既所有親朋好友
多謝各位曾經傾囊相授既師傅師兄
多謝賣魚樂尺比我既爆叔
多謝賣餌比我既某物魚餌舖老闆
多謝梧桐河


雖然依條錦鯉冇我之前斷個三條咁靚仔
但作為自己既第一鯉
真係要好好咁多謝鯉
鍚啖先



最尾一舊餌冇比驚喜我
但係包餌個陣既手震實在係難以忘懷
希望跟住落黎既漫漫長路都可以有鯉相伴
靚鯉魚多d黎搞下我




今日收穫：我份餌真係幾work
鯉既標相好多時都唔係黑標（所以我諗上回斷我個條似係大非多d）
鯉魚非仔藍刀食餌同上鈎掙扎既方式真係好唔同
同埋一支自己用慣既靚標真係幾重要……

呢度係天水圍河，定梧桐河？下次帶枝長少少撈箕。

好似幾好反喎!
恭喜師兄

師姊既 帶魚 遊花園技術  實在了得
上次 見識 過

恭喜