台釣係較大年紀的人玩意嗎??

我覺得最大原因係

1地點
係香港出海易過去水塘，釣場
2裝備
玩lure，玩完仲可以去行街食反睇戲，玩淡水，釣台魚餌抄網線盒標盒開餌盤手杆杆架等等等等，係街到行別人會用奇異眼光睇住你，或問你「去梧桐河？果邊有golf打架咩」
3思想
不嬲講釣魚d人都係諗起投杆勾隻蝦fick落水，等等等等待中魚，仲有就係認為手杆只係釣魚仔，係一d退休前輩的玩意。有好多人仲以為淡水=拎起支杆向上45度角，水面有幾粒野(7星標)。所以先入為

「去梧桐河？果邊有golf打架咩」
这句好搞笑。

最初冇諗過自己會玩台釣
其中一個會玩既原因係我屋企或者收工
係去河（渠）近過去海

呢個大概亦係中國內地流行台釣及傳統淡水釣法
大大多於磯釣等等海釣為主釣法既原因
日本一方面係大片內陸一方面係島國
鹹淡水都有佢發展到既地方

如果釣魚係有其他地方可以玩
我諗地點方面係重要既考慮
幾年前香港旺區有釣蝦場係真係有唔少人去玩
台釣係一種針對淡水既釣法
自然係無一般海水玩法咁易普及

我記得聽過有人用「撩坑渠」黎形容去臭河
但我覺得開放水域釣魚係開心d同滿足感大d
目前為止都鐘意撩坑渠多過魚場



個人認為香港其實係比意料中多人釣魚
梧桐河度釣魚（地龍口個邊）其實唔少後生玩
我記得有次有個中學生一邊釣一邊接電話
同電話既人入面講「我終於搵到呢世人最想玩既野」
其實都幾開心因為而家d後生好多係自己想點都唔知
事實上每年都有後生加入釣魚行列亦都係真事

釣魚玩唔玩得耐好主要係睇會唔會好龜
一般玩過又唔玩除左係時間問題就係釣獲唔理想
所以前幾年休魚期好多魚個幾年係最多forum同網站
而家係相對上少左好多
呢個係一個好現實既問題
好多人都擺脫唔到釣到魚做咩要C&R既心理關口
（換個方法講係覺得釣左成日冇野拎番屋企好硬膠）

如果講吸引後生……
之前有套港漫係講釣魚既可能都有人睇過
呢個係一個唔錯既推廣途徑
日本好多運動或者文娛活動都係透過漫畫推廣成功
邊個諗到圍棋一直被視為老人家活動
最後因為一套漫畫棋魂翻身為一時大熱個個都去學
至於好似game girl個d宣傳既邪道就唔多講

漫畫描寫得一種活動好玩
係要有佢既挑戰性
就算係唔可以同人單挑都可以挑戰自己
釣魚就係一種挑戰大自然既活動
係有佢可以吸引到後生既地方

離題少少
之所以會開始釣魚
係因為之前玩開一隻叫ニコ釣り既網路game
後來佢摺左就心癢難耐點都要玩真既止手痕



台釣係針對比賽（競技）而開發既釣種
相比其他釣法係有引魚多既優點（當然係要睇場同對像魚而定）
睇標同開餌係另一種樂趣
不過有佢既難度同學問響入面
睇住一大堆得字冇圖既文章
自然覺得係難以入門

大陸既台釣文章同影片係好多好值得參考
但係內容比較分散
或者係較難令初學者得到想要既資料
呢點我覺得日本方面有圖有教學係做得唔錯
以shimano同丸九一類釣具釣餌公司做既教程（hera釣）為例
http://fishing.shimano.co.jp/fishing_info/beginners_corner/school_hera.pdf
http://www.marukyu.com/marukyu/hajimete/gyoshu/gyoshu2_4.html

單單以調標為例
台釣調標特化變得好複雜
而日本方面hera釣教程係較少有關調標既介紹
只係簡單咁介紹標響水入面既位置
大概點樣係中魚就帶過
個人認為調標係初學者一個好大既門檻
事實上調幾釣幾對初學者黎講唔係真係咁重要



只要知道點樣睇得到係食餌定係冇餌
初學者對調標要求唔需要咁複雜
要深造既人自然玩耐左就會查書上網問人點玩得再好d
好似餌咁點叫霧化好狀態好
都係要玩一段時間自己睇得多先知咩為之好
咁簡單跟說明調份商品綜合餌玩住先又點解唔得呢

我覺得初學者係需要一d綜合教學幫幫手
因為佢地唔知點解要揀呢種釣法
點解要揀地方點解要知咩對像魚
只係想快d知道點上魚（其他釣法轉玩既都係一樣）
咁寫下點買野呀點整線組（比如係線勾組號數配搭例子）

好似上面丸九既網頁
就係以釣點同對像魚分類左釣法既變化
http://www.marukyu.com/marukyu/hajimete/index.html
如果要編寫教程係可以參考呢類
想吸引人加入唔係一開波就同d初學者講你有冇爬文etc
咁係同佢地講你唔識就咪玩收皮啦係冇分別



台釣起步係唔需要好複雜買好多野
有地方賣竿同標連穿好既線組都係100左右
就算係自己執黎穿以我買第一套野為例

竿 50
子線主線最平既魚絲細細餅各10
太空豆標座鉛座擰圈加埋20
鉛片同鈎各5蚊
支標10蚊
餌10蚊包好勒
加埋一舊水鬆少少
d盤同毛巾番屋企拎啦
只係呢d既話台釣都算係輕便既……

唔計用手絲排釣面包呢類
一般釣魚竿同攪都一舊水唔少得
加埋餌同配件其實都唔見得平左去邊
就要比錢消費既活動黎講唔係算貴
就戶外活動同行山踩車個d黎比
唔好處就係真係會污糟d囉
冇魚上就真係會好悶囉……



如果講台釣有咩唔好
就係真係多野帶多野買地點係遠
冇臭河冇天水圍渠冇野塘
淡水係得魚場同水塘
有人係唔鐘意魚場
水塘係交通係唔算得上方便

最大鑊係台釣玩完一定要番屋企洗野
好難釣完拖住咁大堆野仲同人去街架嘛……
前打個d唔同
野少釣點又方便係有佢既優勝點存在

同埋淡水係真係有陣唔係咁令人舒服既味
海水個陣味腥得黎係爽既
但係淡水……
我每次番去洗個撈過鯉魚既撈箕都腥臭到想死
次次釣完匿響廁所洗野都比屋企人鏟到上天花板
所以買左魚護咁耐死都唔帶魚護出街

回復 1# naobao


    小弟今年40玩台釣9個月,好後悔遲左5年,先中台釣毒,初初教我釣魚師兄點九我,話台釣口的魚無力\細條 唔好玩. 接足後用[幼]竿/[幼]絲頂幾斤魚,枝竿滿弓就炸就炸,真係好大快感.我個人比教中意坐定定釣魚減壓,完全係体間釣魚方法.

最初冇諗過自己會玩台釣
其中一個會玩既原因係我屋企或者收工
係去河（渠）近過去海

呢個大概亦係中國內地 ...
morimami 發表於 10-3-2011 23:48

                               
登錄/註冊後可看大圖

   
講起調標問題
台釣的調標理論同競技釣的理論有很大的分別
競技釣的理論對「調標」有更深，更廣泛的解釋

而競技釣理論中其實有很多技巧都可以放入休閒釣、池釣入面
運用了這些理論不會令你一朝變大師父
但係當你發現/解決了一些一直以來不能解決的問題
就會睇到原來解決的方法一早已經在競技釣的理論中提及過

就以調標的「調目」為例
假設調目4釣2目
很多人都會把標拉得很近子線去剪鉛皮調標
但當你調好標(釣目也調好)後把標向下拉1尺再拋杆
雙勾的狀態很易想得明白，是必定離底的
在沒有餌的狀態下這時顯示的目數理論上就是你剛剛的調目(4目)
但實際上顯示的會是 -- 3目半/3目，或者更小
是因為主線也是有重量的，所以想調標更準就不應該用短主線調標，長主線作釣。

標太小的影響
小的標自然會更靈敏
但若果用太小的標去釣太深的水
鉛皮因為太小
重量被水的張力減去
這時主線和浮標的哪一段就會得不到適當的拉直
而是彎曲的
魚吃餌時出的訊號就會因彎曲的子線而減小，或是失去了訊號
每支標都會有一個適合的水深，所以標先會有號數之分

有講錯唔好打我

回復  naobao


    小弟今年40玩台釣9個月,好後悔遲左5年,先中台釣毒,初初教我釣魚師兄點九我,話台釣口的 ...
kinpig 發表於 11-3-2011 17:13

                               
登錄/註冊後可看大圖

台釣當然有玩啦
有得釣到魚
有得研究下理論
有得研究下份餌

一次過滿足曬你3個慾望

咁年青就對台釣有這麼深的理解，佩服！佩服！

估唔到一個2008年嘅帖被推番出來
果陣我都未正式玩台釣,
好高興依家多左一班年輕人中意玩

小小弟行為8,咩都岩玩!最初玩同最愛都係抬釣,因為比較容易釣到大魚!!(好開心係度識到好多對台釣有熱誠ge朋友!!!原來香港台釣係有希望架!!!))

估唔到一個2008年嘅帖被推番出來
果陣我都未正式玩台釣,
好高興依家多左一班年輕人中意玩 ...
naobao 發表於 2011-3-12 00:07

                               
登錄/註冊後可看大圖

我都好高興你都玩台釣!!