莫欺少年虫之挑戰東瀛!!

2006年4月14日-我中午同鬼佬兄o係機場集合後，就由佢帶路，搞掂哂所有野之後我地仲食埋個老麥先上機，
我地o係5點鐘到達台灣中正機場，呢個只係中途站，鬼佬兄竟然叫去食野......我已經食左兩,三餐喇.............
之後上番飛機又食.......當架機行到6點左右，見到個雲海好靚，所以影底左。
之後我地入黑唔記得幾點就到左福岡機場，daiwa既工作人員-西山先生已經到左等我地，接應左我地之後又話去
食拉麵，當晚天氣跌到可能得十度多d.....好凍....之後我地去到麵當食第五餐.....不過點都要食o既~試完之後法覺真係好好食~
西山先生仲同鬼佬兄互相交動左好多釣魚心得。我唔識講......淨係識聽少少.....咪得個聽字囉~夜晚我地番到酒店執好野，
準備聽朝一早轉機去比賽地點-五島列島。
4月15日-我地朝早食過早餐之後就出發，天公不做美.......落雨....仲凍d.......之後我地坐十點開出o既班機，機上面有靚靚日本
空姐~偷影左一張~不過影得好差.......坐左一個鐘頭，我地就到下五島o既"福江空港"，再會合埋幾位工作人員就有旅館o既專車
接我地，中途仲有間釣魚鋪，鬼佬兄狂風掃"餌木"......清左人地個貨架......我就淨係買左幾隻假餌~因為其他野香港都有~
所以買得少少野，之後再去便利店買左d零食就直去旅館喇~
到左"豆谷"旅館，一入門口差唔多眼見o既野全部都係daiwa......嘩~之後西山先生幫我地安排哂所有野之後我地就執野食飯，
今次淨係食便當，我覺得都好正。食飽之後西山先生同我地講可以出去釣幾粒鐘~我地更係去喇。
一出去西山先生就拎左兩大粉4,5磚蝦比我.....兩,三粒鐘....打到手斷o架喎.......唔理喇~去到先算~我地步兵左十分鐘就到釣點，
一個幾多船迫o既碼頭，開頭試極都冇魚食.......睇下西山先生點釣......原來水清d魚係超現實....有粉有魚食，冇粉都有得食~
不過係食蕉o個隻食~之後我更係有樣學樣喇~真係有，鬼佬兄走去四圍發姣，不過發極都冇姣婆出現......轉頭鬼佬兄釣到池仔，
我都唔執輸~中番條.....不過爆嘴.........都好~有d野玩下~~之後愈釣愈大風，提早執野番去浸溫泉~發覺原來d粉都差唔多份量.....
唔通日本d魚真係咁精.....要睇唔到先有魚埋.........唔理喇~聽日先算喇~~~
之後番到去浸左個超正o既溫泉~爽哂~~~之後有個比賽前o既聚餐，一人一件battle既衛衣，幾正~
之後入到去講左一大輪野之後，抽好籤，就講比賽規則，之後就一人一個紀念獎座，跟住比賽o既一人一件救生衣，一條毛巾，
幾餅主絲同子線，貼紙同布章，仲有3個餌袋，兩個餌盒，一個打水袋。唔駛食都飽哂囉~之後食埋個飯，仲比d日本參賽
選手問完話之後(佢地想知香港野o者~)就各自番房執野休息喇~我就成晚比隻鬼嘈到訓唔到.....其實係鬼佬兄d鼻鼾聲嘈住......
之後唔知"典"左幾耐先訓著。

2006年4月16日-我地當日o係朝早4點鐘就要起身，落到碼頭集合分發蝦粉，d日本參賽者都好努力咁開粉。
見佢地o既開粉方法各有特色，有用大冰箱開，有d落哂手套黎搞等等......不過各人都有一個好好o既動作，
就係開好哂粉之後，各人都會執拾番好d垃圾，同用水沖走哂d餌粉，如果呢種風氣吹到黎香港就冇得頂喇~
之後5點鐘個天光齊，大會再講講d細則就落船囉，見到d渡礁船真係好正，夠大，船頭又夠高黎上落礁，
行緊又夠穩定，唔知香港幾時先有......及後我地落船，坐左20幾分鐘o既船程，就到左一個唔知咩位，
就咁睇d位都好靚，而且船長更好好咁講呢個位要點釣，雖然我聽唔明，但見佢指手劃腳咁都睇得明。
之後鬼佬兄補充番比我聽，要釣成6,7竿出有個跌級位，咁我上到礁都見到，未到跌級o個段全部都清到見底，
咁同埋早一日見到西山先生釣水清要狂谷粉先有，咁今日比賽大會提供左，12蝦6粉(唔知有冇記錯，不過都差唔多)
比我地釣6個鐘，心諗應該都要車輪手咁打。我地上到礁原來要揀左同右，因為比賽大家釣o既位要分開唔記得幾多米，
我揀左右邊，望落去流夠順，o岩o岩o係個山邊有流送出黎，而左邊又有d流推出，所以個角位應該最好釣，
開好竿，角位d風愈黎愈大，不過呢面得呢個位最理想，所以都釣住先，一開始個深度調o係15~17尺，
頭幾口餌都釣到石狗，即表示釣棚接近底部，釣多個呢鐘頭d風大到人都吹得郁，所以一定要行番入去釣，
呢個位釣唔番出面堂流，同埋呢度後面有好多樹，所以都幾難遠投，下下都要就住，之後釣近左，
釣o既標點都好多暗礁，而我每釣一口餌都要打粉，因為一停左唔打，d水清到見到，就冇魚食餌.....
之後打打下，浮波極速飛落去，一抽!條魚有d力，頂左幾手，條魚突然飛番腳邊，霎時間比唔切反應，過石斷左。
之後又釣番同一標點，又同樣爽落，今次老虎都硬頂喇，唔係多多都冇呀。收兩手先頂，佢又同樣開尾掃埋腳邊，
不過今次醒左，補收多兩手絲，同佢扯大攬，今次終於上到喇~原來只係26,7cm既口太黑毛，嘩......點解咁好力o既~
爽呀，不過比賽黑毛唔計，所以影完相放生，之後諗住再追，睇下有冇目標黑沙，不過3個鐘頭o岩o岩到左，
要同另一比賽選手交換位置，我過到西山先生個位睇睇，原來佢個位都幾正，左邊長期行流推出黎，一路推到我頭先釣o個度，
之後開始落流，我再打多d粉，頭兩口都冇魚食，之後再落，一到釣棚就有魚訴，傳統釣魚書教o既黑鯛食法出現。
先沉少少，再浮番上黎，如是者兩次左右，之後就一沉不起，下一個動作我諗都唔駛講喇，更係抽竿喇嘛~
一抽中，條魚好遲鈍，比我收左佢好多手，都係唔開尾，帶佢離開左個級位之後我都定d，差唔多收到3竿外，
條魚先開尾發爛，不過佢唔係衝出去級底，而係衝向腳邊d暗礁位度，真係諗都諗唔到，之後就兩就，條魚就冇乜貨賣，
都係典下擺下咁番黎，一撈入網，嘩~成3斤幾黑沙呀!!!亞媽!我得左喇!!日本第一條黑沙，o個一刻我真係開心到唔知點形容，
咁大個仔都係第一次咁樣開心法~之後鬼佬兄幫我度一度長度，50cm。哈~真係好開心~~~~之後我地影相o個陣，
西山先生o係後面中魚，不過得20cm左右o既黑沙，即刻放生，到我地影完相再落餌，幾分鐘後再下一城~
今次條魚惡好多，不過都係好蠢，一中唔落級底，而係博命衝出大海，哈~頂到我冇得再就，連放左幾手，
不過之後條魚謝哂，一下都冇得郁就比我收左番黎~今次條魚得個長字，46cm...不過得一斤左右.............
影完相再繼續。十分鐘後又中!!不過係西山先生，玩左好耐先上到，48cm~應該真係一o岩流就狂食餌，
o係呢半個鐘連中，再加上有誘餌呢樣重大o既發明，真係勁~之後退到盡就收哂口，突然我又沉波，一抽!中呀!
不過係哨牙妹......咁遠你都黎搵我.........後面西山先生6,70cm連發，不過全部都係烏頭，邊釣邊放。
之後我再落餌，打多兩下誘餌，個浮波飛住落，中喇~不過又係成70cm既烏頭......影完相又放生。
之後差半個鐘夠鐘，我就開始執野，之後落船番到碼頭，鬼佬兄叫我拎出黎影多兩張相，d日本參者者見到，
都即刻講:sh該衣呢~呢句我聽得明~~~哈~~真係威到盡呀~~~入去司令台磅魚，條魚50.1cm~哈~o岩o岩過~~~
兩條合格魚過磅:3192g~~掂呀~~睇番個成績表，如果照正式計分，我竟然到第五名.........不過可惜係交流賽............
不過都好，唔駛打龜面回~~~o個日下午即刻頒埋獎，夜晚仲食左條黑沙，刺身超正!!"餓衣詩"~~~~
之後成班人食飯吹水，我又o係度聽d唔明o既日文......要等鬼佬兄成日幫我翻譯，真係唔該哂佢。
o個晚都唔記得吹到幾點就走番去訓囉，因為第二朝我地又要出發去釣魚~~~

2006年4月17日-朝早我地又係4點幾起身..........不過今日訓到夠哂~因為我早一晚早訓過鬼佬。輪到我炸佢喇~哈哈~
訓到第二朝唔記得邊個叫我起身喇，執好野又再落艇出發，今次大會決定比我地兩個自己上礁，西山先生交底左個電話同幫我地揀好位之後，
佢地就車出左去，我地個位睇落真係........面對魚排，又係腳邊超淺場，超靜流..呀!!應該係流都冇滴先o岩~個船長叫我地釣魚排出少少個角位，
話有過紀錄，好似係50定60cm黑沙，唔信都唔得喇，都上左礁囉。同鬼佬兄兩個開好竿之後，嘩~大咬到非常!!一隻南極蝦換一條魚!!
不過全部都係"呃錢"(其實係讀"呃池"，即係池仔).......釣一條放一條，之後冇咩魚釣，坐底食下早餐影下相，都幾正~舒服都冇得頂呀~
又見到隻好似鹿o既物體走左過黎我地側邊，又唔太驚人喎，幫佢影左張相，之後佢走左我又繼續釣，打多兩下粉，咦!!點解咁o既!!??
咁多魚雷size，超過50cm既烏頭呀!!仲要成群唔驚人o架~哈~點打粉佢都唔走~兜頭打落去佢度都唔走~哈~即刻同鬼佬兄兩個o係副
釣組度加粒子絲浮波，狂中~玩到手抽筋~哈~中就中o係腳邊，玩就玩到老遠~哈~直到我地玩到d烏頭散哂~因為可能一路釣一路放~
放下放下全部走哂~之後d水開始退到盡，見哂個底....就冇魚食餌喇~連池仔都食得極精，望下望下有條石馬頭走左埋黎執野食，
但係點打粉同點釣佢都係o係底度執野食....拖底釣又執好耐都執唔到，開始放棄佢o個陣，再望下，個跌級位有舊暗礁，
側邊有6,7條黑沙o係度呀!!仲要係斤半至兩斤級!!但係打粉佢都唔索.....唯有又係等佢執，到差唔多12點半，鬼佬兄話開始執野，
我就釣埋呢口，佢就即刻食中~哈~負碌仔~又玩~呢條唔知點解好似特別惡咁~放左好多手先升到水，鬼佬兄o係側邊問我係唔係烏頭黎o架~
我開頭覺得唔係~玩玩下又有似係，結果，一道銀光又短身o既~啊~好野~黑沙~~~鬼佬兄幫我撈~上到黎度一度~36cm~
影埋相執野~之後落到船佢地o係出面釣到幾條大黑沙.........唉~玩我地咩~你地釣哂向外海位.....咩都有得玩~又赤立又毛.......
不過我都衰唔哂，執番條黑沙仔~之後我地番到旅館食埋個飯，執好野就去機場出番福岡，夜晚西山先生帶我地去食日本料理，
睇下d價錢，嘩!!今日同鬼佬兄放左幾千蚊走.......原來呢度d池仔好貴o架~~不過都冇計~食飽先算~呢餐食得豐富又好食~正~
之後我地去左d書店度睇書，見到d日本磯釣書，我買左幾本番黎~香港見唔到有得買~跟住行完就番酒店訓囉~
第二朝我地就開始回程番香港囉，有d唔捨得走，日本真係幾好玩，而且風景一流~靚女就不在話下喇~~~
不過今次真係好開心，可以見識到好多野，又學到好多野。有機會一定要再黎過~~~

今次呃到好多野番黎~~~~
有一個黑色餌袋番到黎屋企都唔夠一個鐘就已經比人拎走左...........
d絲我用左成年先用哂~~~頂帽又係比d fd睇中...拎走埋........
係救生衣同毛巾仲有餌袋用到而家~

你的成績又點呀? 真正又有得玩又有得學野

真係後生可為

睇番啲相,,,,真係好回味
無我晚晚鬼聲鬼氣,,,,你又邊瞓得着呀

勁ar 小銘兄
為港爭光

勁呀

原帖由 jacky(-) 於 2007-6-6 23:26 發表

                               
登錄/註冊後可看大圖

你的成績又點呀? 真正又有得玩又有得學野

黎緊好快post~~~~
不過你地最好識做喇~~~~