不結冰甘油南極蝦製作教學

偶然一次於網上參考到台灣釣友用甘油加工南極蝦，覺得效果幾好，所以我都試吓跟住做。
以下係我第一次製作嘅材料…
1）南極蝦，坊間所買嘅磚裝。
2）甘油（丙三醇），食品級甘油有保水，護色，保鮮，抗氧化，以及冰點低嘅特性，可於任何一區化工原料舖購買，一支啤酒樽約50港元。
3）味之素（穀胺酸鈉）增加鮮味。
4）天然蜜糖，甜味據說能吸引魚類進食，我需再加以查証，呢一次加入係希望加長保存期限，因蜜糖係天然防腐劑。 製作過程
南極蝦以筲箕解凍及濾清水份，揀選較大完整嘅蝦放盤中，加入甘油及小量味之素直至蓋過蝦表面，放雪櫃（非冰箱）一至兩個小時，呢個過程係呢用甘油特性，將蝦體內水份抽出。
完成後置於筲箕內濾清水份，經浸完第一次蝦後，甘油已稀釋，可以直接倒掉。
待水濾乾，再將蝦放盤內，加入小量天然蜜糖及甘油直至蓋過蝦表面，放雪櫃一日一夜，待甘油完全浸透蝦體內，完成後將蝦放筲箕內濾清甘油，因此時甘油仍係黏稠狀態，所以過清時間會較長，剩底嘅甘油可留下次使用，蝦經處理，視覺效果非常常好，分裝小膠盒內放冰箱備用。
狀態及測試
製作後嘅蝦，蝦身係水晶透明狀，視覺效果相當不錯，經過兩星期雪藏，蝦體毫無結冰情況，手感有小小油膩但並不黏手，用手指壓爛並不硬身，放於淡水下浸泡，蝦身回復情度非常好，而且水份滲透蝦身後，好明顯較加工前更有彈性及結實，至於海水泡浸測試就要等遲小小再出報告。
另有一有趣測試喺偶然情況下完成，一小盒蝦遺留在室溫環境72小時，經檢查並無發現有腐壞狀況，出水及任何異味出現。
實釣
由胡仔昨晚親自以Hechi釣法試用，佢較重點想了解釣餌水中狀態，結果係滿意的，至於味道方面，因只屬第一次做，過程及材料組合仍有好多變化，而且我亦打算以同類型方法加工其他材料，到時會同大家再分享，感謝！！
備註及建議
味道添加方面，要強化可考慮加入小量香虎（乙基麥芽醇），亦有人會加人少許RedBull,南極蝦汁，酒…各式其式，不過要留意，甘油特性係以抽出水份達至不結冰效果，如你要加入的增味屬水劑，建議先泡浸後再進行第一次甘油處理。
希望大家發揮個人創意及研發精神，將更好效果釣餌與大家分享。

化工鋪甘油有分食用或非食用嗎？

理論上係無嘅,我喺藥房同化工原料舖都買過黎用

藥房一支430g要28蚊

匿名者 發表於 15/10/2021 22:32
藥房一支430g要28蚊

去化工原料舖買喇