2013試場釣行報告
為籌備來緊嘅路亞賽事,今朝一早就同Uncle,檸檬叔叔坐船過珠海試場,
早上街上人少少天氣涼涼地...好舒服...
不過買船飛果陣就唔係幾過癮...
回程差D買唔到飛...被迫提早回程時間,
經過一個鐘多D時間,好快就到喇...再轉一轉車馬上到達,
個釣場嘅環境比想像中正,
唔係平地四四方方果種太人工化嘅環境,
有一邊係貼住個山仔,
中間又有D大石小島,
有野場嘅感覺,而塘邊又幾好行,
基於時間嘅關係,二話不說...大家拿拿林開竿玩吓先,
佢地兩個先玩塘頭,我就同澳門嘅朋友玩塘尾,
呢個場有個特點,同一般魚塘唔同,有唔少唔同款嘅標點,
好似水中大石,水草堆,山邊樹底,水中竹竿,
對於玩假餌嘅釣手黎講,係有得發揮嘅地方,
去到塘尾,我先爬上一舊大石上面釣,
對出已有一大幅水草,當然係先攻呢個位置,
朋友話今日可能較難釣,
天氣陰又有小雨,仲起埋風,
不過我地都好努力咁玩,
拋左一陣,突然見水草底有銀影出現,
咁又唔同喇...醒一醒神...
果然轉頭即中,身型肥肥嘅盲鬼,力水唔錯!!
之後我地喺塘尾有Hits有中有甩,
至於Uncle佢地,就中左紅鮋,
我都同澳門朋友走過塘頭嘅位玩,
釣釣吓又開始雨,不過唔理咁多,
呢面嘅標點又唔同,攻吓D大石位,
玩左一陣,場主就大叫可以食飯,
今日就正喇,午飯打邊爐,
全部都係場內自己種嘅菜同走地雞,
湯底仲有塘內捉嘅蟹,正呀!!
我最中意就係用盲鬼斬件打邊爐!!
因為太好味,我完全唔記得影相...實在罪過...
最值得一讚嘅係場內嘅廁所,
我從來無見過釣場有咁乾淨四正嘅廁所,
而且仲有一隻咁威猛咁乖嘅藏獒看門口!!
釣左上半場,食飯果陣就同塘主傾吓個比賽安排,
大家一路食一路傾,佢就同我地講左唔少攪場嘅苦與樂,
我地亦了解左唔少個場嘅情況...
其實辦比賽,要求真係好簡單,最緊要有足夠嘅魚釣,
坦白講,釣場範圍大,要每一度都有咁多魚俾人釣係好難好重本,
依家傾過一個可行方案,會安排用網將塘嘅一部份間開,
然後放足夠量嘅魚供比賽之用,
我相信咁會好玩好多...
至於賽制方面就可以更好玩更體驗技術,
我地傾向同上一屆差唔多嘅玩法,
分兩個區,比拼條數,兩個區都有魚中就計分先,
一個區就魚量多D,一個區就魚大條D,
聽老闆講,呢個塘係唔會喂魚,
水就係半咸淡,所以魚種就好豐富,
平常放養嘅魚係靠食塘內嘅羅菲同紅眼鰆為生,
所以釣到嘅盲鬼,肥嘅係新放,廋嘅就係舊魚,
唔知係咪D魚要自己搵食,力水真係好好!!
因為今日回程船飛只能買到4點果班,
所以傾左一陣就爭取時間玩多一陣,
老闆認真好,安排位叔叔用船仔車我地玩一陣Boat Game,
咁難得玩魚場Boat,就梗係唔放過,
車出去塘中間嘅大石小島釣,
我同uncle仲企埋上去,真過癮!!
檸檬叔就好野,又俾佢中幾條,
出面嘅標點好正,好有日本釣魚片嘅環境味道,
可惜玩左一陣,架車到了...又係走嘅時候...
其實呢...試場係應該影多D相俾大家參考,
最衰係小弟貪玩...真係罪過罪過!!
好多謝場主嘅熱情招待,更多謝澳門朋友抽時陪我地玩!!
細節安排好,會盡快公報比賽細節,敬請大家留意及支持!!
Sounds fun wor~~~~
I might join~~~~ 條紅鮋係檸檬叔中o架.........................
我就得幾 hit, 中到嘅竟然到腳邊甩咗..............唉......技不如人, 無得講.........
多謝分享! 世外桃源！{:47_3045:} 有個咁正既埸..勁正!!
期待你地比賽既分享!! hei17 發表於 15/10/2013 14:37
有個咁正既埸..勁正!!
期待你地比賽既分享!!
到時歡迎你參與一齊玩:me81
頁:
[1]